La Cultural y Deportiva Leonesa arracada los trés puntos d’Almendralejo (1-3) na despidida final del Extremadura UD
El sufrimientu acabóu. Despuéis d’un más qu’agónicu mes y mediu de supervivencia, l’Extremadura diou los sous últimos pasos sobre’l verde del Francisco de la Hera. Na sua casa. Ante’l sou públicu. Y con catorce futbolistas formaos na cantera d’Almendralejo. Tuvo que ser un llión, al que chaman rei de la selva, el que con trés zarpazos acabara cono tormentu de los azulgranas.
Ander Vitoria, por partida dobre, y Fidel Escobar esmagoron a un equipu qu’hasta l’últimu segundu amostróu la sua maña de supervivencia. Pero no mundu del fútbol pouco manda’l corazón si esti nun tien chena la fardela. La Cultural viaxóu a Extremadura pa llevar los trés puntos. Ya los tien. Pero tamién crucióu la Vía de la Prata entera pa despidir cumo se merez a un miembru más de la sua camada. Porque, al final ¿nun foi esi territoriu la llende del Vieyu Reinu?
Tódolos detalles del Francisco de la Hera
Cita trampa que dicían nos días previos. La trampa de tener que lu xugar, onque tamién la d’esfoutase. Los llioneses, tres caer ante Unionistas el pasáu finde, chegaban a Almendralejo cona presión d’estar “obrigaos” a traer sí ou sí los trés puntos entres los dientes. Porque, nun hai qu’engañase, todo lo demás significaría l’estierru del rei de la selva.
Curro, sicasí, apostóu por un once no que diou entrada outra vuelta a Marcos González, supuxo’l debut d’Alberto Benito, llevantóu’l castigu a Jaime Sierra y Jony Álamo, y devolviéu a Jon Ander Amelibia a la competición. Y ye qu’en frente numás tenía a xugadores de Tercera y dalgún qu’outru estudiante d’institutu. Nun malinterpreten, el más sinceiru aplausu a todos y cadagunu d’ellos.
Cona mirada fincada na victoria, los del Bernesga salieron a acabar cono sufrimientu de los locales a las primeras de cambiu. Sería Jorge Moreno’l primeiru en probar suerte ante Pablo Vázquez. Una dobre oportunidá del central madrileñu que vería cúmo l’arqueiru local-ye quitaba’l gustu del gol.
Nada qu’Ander Vitoria nun arregrara. Un centru de Marcos González sirvíu en bandexa’l cueiru pa que, con un disparu axustáu al palu contrariu, el d’Igorre soltara’l primer zarpazu no cuerpu d’un Extremadura fadión. Y por pouco nun diba ampliar la sua renta, pero la madera pousóu la segunda agonía extremeña.
Siguían los lliones acechando a la sua presa ensin parar, queriendo dexar la cacería rematada enantias del descansu. Jorge Moreno probaba suerte outra vuelta de cabeza, y Ander Vitoria por abaxo. Ensin premiu pa dambos dous. Un troféu que si llevaría’l que más lu mereciéu ante Unionistas.
Fidel Escobar, sobre la bocina y dende fuera del área, mandaría un segundu zarpazu allá au l’arqueiru local nun pudiera chegar. Golazu del panameñu, fruitu d’esi gran papel qu’está a desenvolver vistíu de brancu. Los llioneses, al cabu del primer actu y empiezu del siguiente, y cono 0-2 no marcador, quiciabes baxaran dalgo la guardia.
El tiempu suficiente pa que Mulero amostrara que la presa on tenía vida. Nin por esas, la Cultural llograba caltener a cero la sua meta. Pero tampouco nun sacrifiquen a esti llión, que sía un futbolista de Tercera, de Champions, ou Infantil, cualquiera puede facer un gol no fútbol. Pergunten n’Irún si eso ye verdá.
Los locales vieron la lluz al cabu’l túnel, esi deséu de despidise por todo lo alto. Onque esa lluz s’amatóu de la qu’Ander Vitoria, de cabeza tres una falta tirada por Marcos González, puxera’l 1-3 no electrónicu. Agora sí, l’Extremadura dicía adióus a los sous 15 años d’historia.
Tovía houbo tiempu pa qu’Ander Vitoria, nuevamente cona tiesta, llevara’l balón pa casa, pero’l sou remate acabóu llonxe del arcu. Tamién pudieron los azulgranas facer el segundu, pero Dani Sotres ya pechara la sua xaula al salir. El final de los 90 minutos significóu dúas cousas, una vuelta a Llión conos trés puntos y dúas victorias a domiciliu consecutivas; y catorce xugadores que ya nun tendrán que llevar al llombu los problemas d’outros.
Acabóu l’aventura de los d’Almendralejo. Trés zarpazos d’un llión compasivu supuxeron el final a una agonía que s’allargóu mui bien d’ello. Los brancos vuelven conos trés puntos, pero la presa queda n’Extremadura. Que tenga polo menos un entierru dignu. Esi que los d’arriba nun quixeron pagar. Porque eso ye’l fútbol modestu. Un negociu. Y los que pagan la cuenta nun son los dueños, sinon lo que muerren por sostenelu.
